Senbide Beıjiń Hústondaǵy Qytaı konsýldyǵyna AQSH quqyq qorǵaý organdary qyzmetkerlerinń "májbúrli túrde" basyp kirgenin aıtyp, aıyptaǵan. Bul týraly Suth China Morning Post habarlady.

Qytaı SİM ókili Van Venbın jasaǵan málimdemesinde AQSH-tyń konsýldyqqa kirýge quqyǵy joq ekenin jáne Beıjiń "qajetti jaýap qaıtaratynyn" eskertken.

– Qytaıdyń Hústondaǵy bas konsýldyǵy dıplomatıalyq jáne konsýldyq úı, sondaı-aq Qytaıdyń memlekettik menshigi. AQSH konsýldyq qatynastar týraly Vena konvensıasyna jáne Qytaı-AQSH konsýldyq kelisimine sáıkes bul nysandy eshqandaı tásilmen buzbaýy kerek, – degen Qytaı SİM ókili.

Vang AQSH-tyń bul qadamyna "qatty narazy" jáne "oǵan tolyqtaı qarsy" ekenin aıtyp, Beıjiń Vashıngtonǵa qatań eskertý bergenin málimdegen.

Juma kúni Húston konsýldyǵynan Qytaı dıplomattaryn shyǵarýdyń sońǵy merzimi ótkennen keıin, AQSH memlekettik departamentiniń sheneýnigi delingen er adam jáne basqa birneshe adam konsýldyqtyń artqy esigin kúshpen ashyp kirgen.

Habarlamada aıtylǵandaı, departamenttiń qyzmetkerleri oǵan deıin úsh bólek esikten kirýge tyrysqan, biraq kire almaǵan.

Biraz ýaqyttan beri AQSH pen Qytaı arasynda shıelenis kúsheıe tústi. Qurama Shtattar prokýrorlarynyń sotqa bergen málimetteri boıynsha, Amerıkadaǵy qytaı zertteýshileri vızalyq alaıaqtyǵy úshin qamaýǵa alynǵan. Vashıngton "vızalyq alaıaqtyq jasady jáne áskerı baılanystardy jasyrdy" dep kúdiktengen qytaı ǵalymy San-Fransıskodaǵy Qytaı konsýldyǵyna qashyp tyǵylǵanyn málimdegen.

Sársenbide Tramp ákimshiligi Qytaıdyń Hústondaǵy konsýldyǵyn 72 saǵat ishinde jabýǵa buıryq bergen.

AQSH memlekettik hatshysy Maık Pompeo Vashıngtonnyń sheshimi Qytaıdyń zıatkerlik menshikterdi "urlap jatqandyǵyna" baılanysty qabyldanǵanyn málimdegen.

Beıjiń bul qadamdy "saıası arandatýshylyq" dep ataǵan.

Biraq Tramp Qytaı konsýldyqtarynyń kóbin jabýǵa buıryq beretini "árqashan múmkin" ekenin málimdegen.

Keıinirek Qytaı ońtústik-batystaǵy Chendý qalasynda ornalasqan AQSH konsýldyǵyn jabýǵa buıryq bergen. Qytaı bul qadamdy AQSH-qa "qajetti jaýap" dep atady.

Vashıngton Beıjińdi saýda jáne koronavırýstyq pandemıaǵa qatysty birneshe ret aıyptaǵan, sondaı-aq Qytaı Gonkongqa qaýipsizdik týraly daýly jańa zań qabyldady.

Al Tramp Qytaıdyń Shyńjań provınsıasyndaǵy etnıkalyq qazaqtar men uıǵyrlardyń qysymǵa ushyraýyna qatysy bar 50-ge jýyq qytaılyq kompanıaǵa sanksıa saldy.